我與美食有緣

你看到嗎?我送上衷心的祝褔~

wing7 | 06/02/08, 13:44 PM | 生活 | (81 Reads)

大家睇唔睇到我的祝福!?

留言(0) | 引用(0)

為何博益要結業?我明既......

wing7 | 27/01/08, 23:31 PM | 生活 | (106 Reads)

本來一早想寫，但又唔知點寫，所以拖到而家。

唔知係因為明白咩叫大時代變化，係人所無法阻擋。

我都是做出版，所以我明。

明雲海的難過及不憤，亦明白大家的心意。

先說，早排鍾偉明在蘋果用了三日罵被發行影響，在街買唔到書。

朋友問我係咪事實。

當然，只係為了唔想好快被人迫收書，所以有成肚火都出唔到聲。

點知，今日博益結業。

無話可說，因為我是行內人，仲有咩好講。

大家認為博益賺錢?

對一間上市又或大公司，唔係賺大錢就唔算係賺錢。

即你賺十蚊都唔算一樣，因為大公司仲有龐大的行政及宣傳費用。

呢條數好甘。

最重要，係而家無人睇書。

再加上，書局只為了銷量而入貨，又或保護主義，非我書類休想入架，亦是一個事實。

當然，無人明我地呢d細公司有幾慘，被人當人球踢來踢去，唔再特別接自資出版，其中一個原因，就係一般人不會明白，以為你無幫佢地發書。同時，亦唔明你點求人要書，差在未跪地。

我向家中大人說，你個女都好叻。

一位普通人，無錢無背景都可以求到人比我地放書入書局。有幾多細公司，想都唔駛想。

所以，對三位作者都盡了人事。

有幾多人，真係出完書都見唔到街。^^

亦因為呢幾年捱餐死，令我明白細公司有幾慘。

但同時，亦教識我如何營運生意。

即，想搵錢就唔好印書咯!

唔係印完書就得，仲要搵人設計、編輯、運輸、會計及宣傳。若果大出版社，仲要養大堆人，每一件事都係成本，條數真係好好計。

最重要，寸金呎土的香港，仲要預留一d地方做倉，即每個月再要付一筆錢去放書存書，仲要保養!

大家咪以為掉書好容易，為了不讓別人取走書再賣，於是要將書整爛，仲要搵人拋棄。我曾經搵過環保商掉書，對方話要收我錢呀!後來搵到一間可以免費，但已令我大開眼界。

係呀!做生意樣樣都係錢，有開業有結業都是沉常事。

我想說，比起大家，我對博益的感受更深。

因為，我夠老，早於仍是TVBI時期的博益，我也一早見過了，因為當時我在香港電視而博益就在同樓。所以，博益並非今天才賣盤結業。這間出版社，一直也努力生存，對香港出版業來說，是舉足輕重。

這已很足夠!

因為，出版界有多艱辛，只有行內人才知。同時，也面對另一本書，遭遇亦是如此。

其實，做出版這盤生意已很困難，亦可以話無利可談。所以，見到《野蠻奶奶》都只係得啖笑，只是行外人一廂情願想法。

印書等於印銀紙?自從雜誌廣告價跌到$2000一版，仲有咩好講?因為被行外人搞到書刊廣告平到無命。

雖然下一步目標係做網站，但一樣有人去到免費登廣告，大家話點玩?!

只係，硬頸如我又點會咁易認輸，特別這幾年訓練我看透世情，所以更加讓我明白....天下無不散之筵席，有今日的失才有明天的得。

希望雲海可以爭取回版權，雖然很困難，因為這是一買一賣的合約，所以很困難。同時，也希望他可以取回書。

當然，不賣舊書給原作者原因之一，對方可能係大公司，根本沒必要如此做，同時，亦可能倉太大，一次過掉比再整理更不需花人手。

更重要，可能書一早已掉了也說不定，所以倪匡叔反應最正常，因為見怪不怪.....反正未來是電子書世界，一般印刷書，應在十多二十年內，變成只做貴價書或時裝設計書天下。

時代，一向是如此，只有人去適應學習順應時代。

PS.原來霑叔不文集仍是最好賣，只係.....亦成為歷史一部份。同時，雲海有一定知名道，一於去聯合啦!不用擔心無人幫你發書呀!

留言(0) | 引用(0)

買個撻食個榴槤包再飲樽庄冰鎮奶茶~

wing7 | 11/01/08, 11:49 AM | 美食 | (876 Reads)

呢日因為別的關係，令書遲了去發行，於是立即趕去發行補救。

工作就是如此，唔係你無問題就無問題，別人的問題一樣可以成為你問題!

請罪當然要請下午茶，撲去蛋撻王買「撻」。

因為賣晒要等佢地再整，於是四處八。

竟然見到有冰鎮奶茶及榴槤麵包。

好呀!真進步!

難怪佢地在工廠區有好多分店。

都話只要有心，鐵柱都磨成金!

*我唔食榴槤，所以唔知包既味道!不過，能夠識變通，都係好事!

*望似奶皇包多D!

*仲有冰鎮奶茶，細細樽，顏色都幾對版，下次一定要試試!

>>之前鍾偉民在蘋果罵了三天，就是有關發書問題。朋友也說，現在很多自資出版很難生存!當然，我唔想收書，所以都是小說小錯!不過，真係無位走?我又唔信!路，是行出來既!努力!

留言(2) | 引用(0)

找回在夏銘記的集體回憶

wing7 | 04/01/08, 10:32 AM | 美食 | (182 Reads)

*真係佢地炸魚皮最好食，又薄又脆又少粉，最重要係無骨，真係食過好多有骨刺。呢度賣$10(好似)，所以無說話可再講!!

為甚麼要有食神?

當你走在街上，想找地方食飯時就知，甚麼是食神。

因為，你真係可以都係同一碗麵，但水準可以差之千里。

呢日既食神，係給我重遇夏銘記。

人生有甚麼是值得回憶?天星碼頭拆唔拆，關我同你咩事。

生活沒有實質影響，但事實係一些回憶，在拆卸後便一點不漏地消失。

望住塊爛地，你唔會再記得過去在此見到大堆新娘拍照既日子。

集體回憶，就是如此。

當然，有未來才有過去。

只係，舊都唔一定有保証，有d係無法向前行亦保持唔到水準，令人惋惜。

好好彩，呢日給我重遇你---夏銘記。

仍是那那四寶，仍是那些一堆堆又特別滑的紫菜。

仲有辣到無命培既辣椒油，以及樽庄可樂!

吃一口，喝一啖，人生也不過如此!

感謝老闆娘仍記得我，更畀面讚一句靚女咗。下次唔駛啦!心知就算，你在收銀一講，我在最尾位置一答，大家都會噴菜就唔好!

集體回憶仍在，感激上蒼，仍讓食神給我機會，再嚐夏銘記的美食!

*這是我的例牌麵，即貪心人表現。

*墨魚丸爽得想用來做火鍋。

*佢地既辣椒油，一流!夠辣又唔會有渣，頂級!

*近期戒凍飲，呢日例外，點可以唔飲可樂配四寶!

*牆上既介紹，見証呢間老店的歷史。
>>下次一定要食牛腩，好掛念呀!

夏銘記麵家
地址 : 油麻地新填地街151A(駿發花園近油麻地百老匯戲院)
電話 : 2713 4323

留言(1) | 引用(0)

祝.2008年....人人都係食神!

wing7 | 01/01/08, 23:48 PM | 美食 | (95 Reads)

兩張相，大家鍾意邊張?

我就鍾意下面張。

但上面張又無咁拆色，又靚d!

最後，決定兩張都放!

祝大家新一年更加開心快樂!天天都有食神啦!^^

留言(2) | 引用(0)

HOHOHO!!!聖誕日快樂!

wing7 | 25/12/07, 18:23 PM | 生活 | (88 Reads)

真係估佢唔到，$10四個酥(山崎買)，真係幾好食!

翌日食都仲好鬆脆!

在此祝大家日日都開心快樂!天天有食神!

留言(0) | 引用(0)

下午茶勁抵食....二十幾蚊食炸魚+薯仔沙律+飲品

wing7 | 24/12/07, 01:38 AM | 美食 | (302 Reads)

或者你可以話，我又要返工點食下午茶?

我明，但星期六、日都好，都要選下午茶來食，原因價錢差好遠之外，仲因為可以食多好多唔同款式，但價錢差好遠。

好似呢間下午茶，平均二十幾蚊一個餐，特別個意粉抵食到無譜，去快餐店都食唔到。女仔，真係夠兩個人食!

呢日三個人要了四個餐再加一個麵包，就可以當晚餐食!

你明我點解成日呻貴，只是一百多小小夠三個人食有餘，平均三十幾蚊一個人。

想點?!

而時間到六時前，即五時後六時前去食都仲食到!

真係好過食正餐。

>>其實有d下午茶在星期六、日都有，真係好過食正餐!我會搵多d比大家啦!
*呢個薯仔沙律真係幾好食，後面既炸魚無咁燶，但為了前面既薯仔色，唯有犧牲佢。^^
*呢個追加既餐，因為我想食那朱古力炸多士，但最後是失望啊!麵包無味，湯粉又淡，唯獨隻雞翼可以一食，夠脆!

*另一個有湯粉及豬扒包，味道ok啦!

*一直我認為最抵食既意粉，大碟到可以夠兩個人食!你睇，真係好大碟，再加芝士及黑椒，無敵....超肥!
*再加$10仲有大大個包，一旁既鮮茄汁，兩位大人食得好開心!^^
>>近期再食到其他抵食既下午茶，再update啦!^^